TANDREMO LAHY
Tandremo lahy,
fa eo amin'ny fiainana,
be ny tanalahy,
ratsy foto-pisainana.
Tandremo fa matetika,
ny tena akaiky anao,
no mazàna mitetika,
ny hidarabohanao.
Tandremo fa misy mody,
miseho ho tena namana,
no tsy matahotody,
tsara kokoa tsy manana.
Tandremo fa amin'ireo,
nandaniana hery nobeazina,
no lasa tena mankaleo,
Izay lalovany lasa ngazana.
Tandremo, ny manodidina,
fa misy miandry kendritohina,
manao izay hampitsingidina ;
sy ny hampitondra voina.
Tandremo fa maro,
ireo tsara imolotra,
minia mampifangaro,
ny madio sy ny lomotra.
Ny fahendrena mila mailo,
anivon'ny tontolo misy anao.
Tazony ho tsiambaratelo,
ny vina, kinasa rehetra ho atao.
RASAMINDRAKOTROKA Andry Tiana
31 Oktobra 2024
Date de dernière mise à jour : Jeu 07 nov 2024
Ajouter un commentaire
