RAHA IZAHO NO HO FILOHA
RAHA IZAHO NO HO FILOHA
Madagasikara Nosy miavaka, meva sy tsara.
Kilasiana koa, ho Firenena mahantra indrindra.
Ny mponiny mivavaka, hatreny amin’ny alitara.
Nosy hanan-karena, raha toa manova famindra.
Ny fandrosoany hiankina amin’izay ho Filoha,
Izaho na ianao na izy samy mety daholo;
Raha mahay manentana ny Malagasy hifoha.
Ho marisika am’izay ny tena hanova ny tontolo.
Raha izaho no ho Filoha, …
Alohan’ny rehetra dia hankinina amin’ny Tompo,
Ny vina sy ny fandrosoana heverina hatao.
Ka Izy hanolo-tsaina ho an’ireo izay hanompo,
Vonona hamadika ity Firenena efa tonta ho vao.
Raha izaho no ho Filoha, …
Ny toe-tsaina miankin-doha mila hovaina tanteraka.
Mba hanan-kambo amin’izay ka ho tena Malagasy.
Hiezaka hiara-mihoitra, tsy hanao tantireraka.
Hisaina ho tena Malagasy fa tsy vazaha taratasy.
Raha izaho no ho Filoha, …
Ho vaindohan-draharaha ny fandriampahalemana.
Havaozina ny fampianarana ho araka izay filàna.
Hokajiana ny fahasalamana ho laharam-pahamehana.
Ny olona rehetra ho samy ambanin’ny lalàna.
Raha izaho no ho Filoha, …
Ny fambolena, ny fiompiana ho ezahina hivoatra.
Ny harena ankibon-tany hotrandrahina ara-drariny.
Tsy hisy Malagasy intsony ho tezitra, hitroatra;
Ho tsapa mantsy fa hahazo tombony ny taniny.
Raha izaho no ho Filoha, …
Ny harena an-dranomasina ho an’ny Malagasy.
Tsy ho tompony mangataka atiny fa tena hizaka;
Izay tsy hanaraka izany, avelao hangasihasy.
Tapitra eo ny gaboraraka ny Firenena kosa hitraka.
Raha izaho no ho Filoha, ...
Ny zava-novokarina alohan'ny hanondranana azy ;
Hahodina, hohatsaraina ho lafatra, ka hiaka-bidy.
Mba hisy fiantraikany ho an'ny isam-pianakavy.
Rehefa sambatra avokoa ny olona dia vita ny adidy.
Raha izaho no ho Filoha, …
Hojerena manokana ny lalànan’ny fananan-tany,
Ireo Malagasy nanamainty molaly mba tena hisitraka.
Mifarana hatreo ny vaky fasana, very taolam-paty mitomany.
Hamoraina koa ny famindrana lova ka tsy hisy hisintaka.
Raha izaho no ho Filoha, …
Tsy hisy foko ambony na ambany hozarazaraina;
‘Zay fanaom- panjanaka ahafahany manondrana.
Izany rehetra izany mitaky fiovan-toe-tsaina;
Iray ihany ny Malagasy tsy misy tanivo tanindrana.
Tsy izaho mihitsy anefa no ho Filoha, …
Fa soso-kevitra atsipy sao misy ihany mandray;
Na anjara biriky atolotra hampandroso Firenena.
Ankinina amin’Andriamanitra, Fanahy, Zanaka sy Ray.
Dia azo antoka tanteraka ny hisian’ny fandresena.
RASAMINDRAKOTROKA Andry Tiana
20 Septambra 2018
Ajouter un commentaire
