MBOLA HO AVY ILAY MARAINA
MBOLA HO AVY ILAY MARAINA
Betsaka no kivy ny vahoaka Malagasy,
Am’ireto zava-misy ka lasa toa mangasihasy.
Tsy manan-kery intsony, hany sisa tanam-polo,
Iatrehana mosary, kolikoly, herisetra sy bontolo.
Mihasarotra hatrany anie izany fiainana,
Hazakaza-dava tsy misy mba hisainana.
N’aiza n’aiza aleha fahasahiranana no hita.
Irony zava-tsotra aza mety ho ela vao vita.
Ny vidin-tsolika tsy mitsaha-miakatra;
Ny vidin-jiro sy rano mila tsy ho takatra.
Ny vary izay tena sakafo no lasa haitraitra.
Ny fanafody zary mangidy sady mafaitra.
Irony anana fividy, fanao fangaron-daoka,
Izy indray izao no nivadika, lasa tena laoka.
Ny voankazo koa niova, lasa aingitraingitra,
Tena mampihivin-doha mova tsy vinaingitra.
Ny fandriampahalemana, tsy lazaina intsony.
Ny toe-tsaina simba, ny fo feno lonilony.
Raha atao indray mijery maloka e ny tontolo;
Izay tazanina indrisy, mampitsangam-bolo!
Soa mbola miahy ilay Andriamanitra nahary;
Hitokisana, hanavotra, hitahy ity firenena marary.
Ka ho afa-tsento fa "mbola ho avy ilay maraina"
Ho nofinofy ratsy sisa ilay Nosy karankaina.
RASAMINDRAKOTROKA Andry Tiana
27 Febroary 2018
Ajouter un commentaire
